John 8

E Köövo To Nok A Taateß Hat

1A napan to këh ee pa Iuun Hinhin Apuh, pare vahah ee pa ma vöön pee. Ivëhkëk, e Ieesuß to nö en manuh pa Tope Öliv. 2Pa pöstakah ne Ieesuß to taneß hah maß nën, pareß hah en manuh pa Iuun Hinhin Apuh. Ka napan nö ee maß manih peß, ko tönun töön poë, keß ihoß, pareß taneo en pa vavaasis raoe. 3Ko teß vavaasis to nat i ne o Vavaasis pe Mosës, me ro Parësiß, me ee maß pa pah köövo nee to nat ne sih poë, pan eß a köövo teßteßvaasiß, pare vasun poë manih pa matëëra napan, 4ko soe ke Ieesuß pan, “Tövavaasis, e köövo vëh to teßteß me non sih a meh voe, e voe pamëh hikta teß non pan e voe koman peß, ahik. 5Eën koman va poß nom nih, o Vavaasis pe Mosës to soe ka rora sih pan, ea se tösvös ee po köövo to nonok ne a ma taateß to matan va ne manih?” 6Ee to nok a soe vaßih pan ee se ep këh ta hanan nee se vahoß koe e Ieesuß po vahutët. Ivëhkëk, e Ieesuß to ihoß vaseak, pareß kinkiun en po oeh pa kumis koreneah.

7Kee ihi avoeß e ne peß pa ma hi. Ivëh, ke Ieesuß takëp taßtaß maß, pareß soe ke raoe pan, “Etereh varih peöm to teß nem manih kuru to hikta nat ne pa nok a taateß hat, ee se sun, ko vi na a vös vamomoaan manih pe köövo pamëh.” 8E Ieesuß to ihoß vaseak hah, pareß kinkiun hahah kov en po oeh pa kumis koreneah. 9Ko teß varih to tënan ne a soe ne Ieesuß to sosoe non, taneo ee pa nö veveahih. Ee to taneo manih pa nap mamanot, pareß öök non pa napan kurus. Ee to vakëkëh tavus ee pe Ieesuß me e köövo pamëh to sun non pa mataneah.

10E Ieesuß to taßkë maß, pareß hi e köövo pamëh pan, “A napan varih to teß ko ne manih nö nih? Ahikta paeh pee to teß non manih se vahoß a oah po vahutët.”

11Ke köövo pamëh soe ke Ieesuß pan, “Topoan, ee to vanönö vahik vur ee.”

Ivëh, ke Ieesuß soe ke poß en pe köövo pamëh pan, “Eöß me to hikta se vahoß a noß oah po vahutët. Eën se nö na, parën nat nom nok amot hah a taateß hat pamëh.”

O Maaka Va Po Oeh Ivëh E Ieesuß

12Vasuksuk in a ö no teß vavaasis to nat ne o Vavaasis pe Mosës, me ro Parësiß to pupunöß ne e Ieesuß. Ke Ieesuß vavaato avoeß me non pa napan, pareß soe ke raoe pan, “Eöß to teß va noß manih po ëman va po oeh vëh, ka teß vëh to vavatet non a taateß vih me a ma soe peöß, eß to hikta antoen non a teß manih pa popoen, eß se kon en po ëman vëh se heß poan o toßtoß tamoaan.”

13O Parësiß to tënan ee pa soe ne Ieesuß to vavaasis non, pare soe ke poë pan, “A ma tamoaan nën to vavaato vaviß suk hah a nom sih me a ma kiu nën to nonok nom, keß ivëh, a tah no a napan to hikta onöt ne a vaman suk a oah.”

14Ke Ieesuß piun raoe, pareß soe pan, “Oman, eöß to vavatvus noß sih a soe to soe suk koman e non peöß. Ivëhkëk, eöß to hikta pikpiuk a no neöm pa ma soe poë varih, ahik, a ma soe poë varih ee a ma soe man. Suk ataeah, eöß to nat e noß pa vöön nöß to taneß voh maß, paröß nat me e noß pa vöön nöß to nönö hah noß. Ivëhkëk, eöm to hikta nat nem pa vöön peöß, paröm hikta nat me nem pa vöön poanheh nöß to nönö hah noß. 15Eöm to kiiki nem sih a taateß pa teß pa taateß va po oeh vëh, peöß to hikta kiiki noß a taateß pa ta pah teß. 16Ivëhkëk, eöß se keh nok a taateß kiiki teß, a taateß kiiki teß peöß a man. Suk ataeah, eß to hikta teß non pan eöß varoe to nonok noß a taateß pamëh, ahik. E Tamön vëh to vanö voh a maß neoß to teß vaßpeh me e non peöß, köß kiiki noß a taateß pa teß. 17O Vavaasis pe Mosës to soe non pan, ta poa teß se keh soe ta pah tah, pare vapöh kokoman a soe pamëh, ea se vaman ee pataeah nee to soe. 18Ivëh, ke eöß koman peheoß to vavatvus noß sih a soe to soe suk koman e non peöß, ke Tamön vöh pa vöön va kin to vanö voh a maß neoß to vavaßaus me e non pa ma soe peöß.”

19E Ieesuß to sosoe va non manih, ko Parësiß hi hah ee peß pan, “E tamömah vëh nën to tooto suk nom teß non nih?”

Ke Ieesuß piun raoe, pareß soe pan, “Eom to hikta nat rakah nem peöß poß Tamön. Eöm se keh nat e nem peöß, a, eöm to nat me e nem pe Tamön.”

20E Ieesuß to sosoe non a soe vaßih pa ö neß to vavaasis non a napan koman A Iuun Hinhin Apuh pa ö neß to sun vatët non pa ö no a napan to vavahoß ne sih a ma heß pee. Ivëhkëk, a hikta teß to öt poan, suk ataeah o poen neß se taum a punis me o kamis to meß avoeß e non pa tavus maß.

E Ieesuß To Soe Pan A Napan To Hikta Onöt Ne A Nö Pa Vöön Neß To Nö Non

21E Ieesuß to soe hah ke raoe pan, “Eöß se nö eoß, köm hikta onöt nem a ep hah a neoß. Eöm se mët vaßpeh me em pa ma hat peöm. Eöm to hikta antoen nem a nö pa vöön nöß to nönö noß.”

22Ivëh, ko teß susunön po Jiuß vaiihi e ne, pare soe pan, “A teß vëh se kës ip vamët hah ea, peß to sosoe va non manih pan, ‘Eöm to hikta onöt nem nö pa vöön nöß to nönö noß’?”

23Ke Ieesuß soe ke raoe pan, “Eöm varih, eöm a napan va vakunah, peöß a te va pa vöön va kin, eöm varih a napan va po oeh vëh, peöß a teß to hikta teß noß pan eöß a teß va po oeh vëh. 24Ivëh, nöß to soe suk voh ka neöm manih pan, eöm se mët vaßpeh me em pa ma hat peöm. Oman, eöm se keh hikta vaman a non neoß pan, Eöß Kove Vëh, Eöß! Ka ma hat peöm se teß e ne, köm mët vaßpeh me em pee.”

25Ko teß susunön po Jiuß hi hah ee peß pan, “Soe ka möm ah, eën poß eteh?”

Ke Ieesuß piun raoe, pareß soe pan, “Po taneo nöß to soe voh keoß peöm peöß eteh. 26Eöß to teß me noß a ma soe nöß se vahoß rakah manih pa ma taateß peöm. Eöß se iniinan a ma taateß peöm vamanih pa tökiiki teß. Ivëhkëk, eöß se soe varoe ka neöm a ma napan va po oeh vëh, pataeah nöß to pënton manuh pa Teß vëh to vanö voh a maß neoß. Ka Teß pamëh, eß a sosoe man.”

27O teß susunön po Jiuß to hikta nat ne pe Ieesuß to sosoe vanat e non pee pe Tamaneah, Sosoenën. 28Eß to soe ke raoe pan, “A poen nöm se kë a neoß e Koaß Teß Pa Napan Kurus manih po naon, eöm se nat va poß em manih pan, Eöß Kove Vëh, Eöß! Eöm me se nat va e nem manih pan a ma tah kurus nöß to nonok noß, nöß to hikta nonok noß pa tasun me o kokoman koman peöß. Ahik, a ma tah kurus varih nöß to nonok noß sih, eß a ma tah ne Tamön vöh pa vöön va kin to vataare voh a neoß köß nonok noß. 29E Tamön vöh pa vöön va kin to vanö voh a maß neoß, pareß teß vaßpeh tamoaan me e non peöß. Ka ma tah nöß to nonok noß sih, ee a ma tah to heß vaeö ne sih poë, keß hikta onöt non a anoe a neoß pa ta pah poen.” 30E Ieesuß to sosoe va ko non nën, ka nap peo vaman ee peß.

A Soe Man Se Nok A Napan Kee Tavus Këh A Taateß Hat

31E Ieesuß to soe ke ra napan va Israël varih to vaman poë pan, “Eöm se keh vatet vavih rakah a soe peöß, paröm öt vakis o vaman me o vavaasis peöß, eöm se tavus rakah em o vamomhë peöß. 32Paröm nat va nem manih pan a ma soe peöß ee a ma man rakah, ka ma soe man poë varih se me hah ee peöm manih pa taateß teß vavih.”

33Ka napan varih to tënan ne a soe pe Ieesuß piun poë, pare soe pan, “Emöm to nat e nem pemöm ö pus koaß pe Abraham, ka hikta paeh pemöm to tavus voh a teß kikiu akuk manih pa ta meh teß. Vahvanih kën soe kamöm pan, ‘Emöm se tavus vavih hah?’”

34Ke Ieesuß piun a soe pee, pareß soe pan, “Eöß to soe vaman rakah ke voh eoß peöm, o teß varih to nonok ne sih a ma taateß hat, ee o teß to kiu akuk ne manih paan a taateß hat. 35O teß kikiu akuk to hikta a onöt ne a teß manih pa iuun pa kën tom taman varih to matop ne raoe. Ahik, o koaß varoe to antoen ne a teß tamoaan manih pa iuun pee ra kën tom taman. 36Ivëh, keöß e Koaß pe Sosoenën se keh vaßaus a neöm, köm tavus këh maß a taateß hat, a, eöm se teß tamoaan nem manih pa taateß teß vavih. 37Eöß to nat e noß peöm o pus koaß pe Abraham. Ivëhkëk, eöß to nat e noß peöm to kehkeh ip vamët e nem peöß. Suk eöm to hikta iu tënan nem a soe peöß, paröm öt vakis. 38Eöß to sosoe ke noß peöm pa ma taneah ne Tamön to soe voh ka neoß. Ivëhkëk, eöm to nonok e nem pa ma taateß nöm to kon taneß voh manih pe tamëneöm.”

39O teß susunön po Jiuß to pënton a soe pe Ieesuß, pare soe ee pan, “E tamamöm e Abraham.”

Ke Ieesuß piun raoe, pareß soe pan, “Eöm se keh teß vamaman voh nem pan eöm a pus koaß pe Abraham, eöm se nonok e nem pa ma tah ne Abraham to nonok voh non. 40Eöß to sosoe ke noß peöm pa ma soe man, nöß to tënan manuh pe Sosoenën. Ivëhkëk, eöm to pupunöß e nem pa ip vamët a neoß. E Abraham to hikta nok voh ta tah to matan va non manih pa ma taateß nöm to nonok nem. Ahik. 41A ma taateß varih nöm to nonok nem, eß a ma taateß nonok voh pe tamëneöm.”

Ivëhkëk, o teß susunön po Jiuß to soe ee pan, “Emöm to hikta teß va nem manih po koaß varih to hikta nat ne pe tamëëre. Emöm to teß ro me nem a pah Tamamöm, ivëh e Sosoenën.”

42Ke Ieesuß soe ke raoe pan, “E Sosoenën se keh teß vamaman non pan eß e Tamaneöm, köm onöt e nem pa iu a neoß. Suk ataeah, eöß to taneß voh maß manuh peß, paröß teß noß manih kuru. Eöß to hikta nö voh maß manih pa tasun me o kikis koman peöß. Ahik, e Sosoenën koman to vanö voh a maß neoß, köß nö maß manih po oeh vëh.

43Eöm to hikta iniinan vavih pataeah nöß to sosoe noß sih, suk eöm to hikta iu tënan nem o vavaasis peöß. 44Eöm o pus koaß vamaman rakah pe susun po oraß hat. Eöm to iu nok rakah nem a ma taateß neß to iu non. Moaan voh po taneo neß to hinën a napan pa ip vamët raoe. Pareß teß non pa vapikpiuk a soe man. Suk ataeah, a soe man to hikta teß non manih peß. Ko poen neß se nok o piuk, ko piuk pamëh vateeraß en peß, eß e taman rakah in a taateß piuk. 45Eöß to sosoe vatëh ke noß sih peöm pa taateß man, ivëhkëk, eöm to hikta vaman nem a tah nöß to sosoe noß. 46Eteh rakah va peöm to nat non a hat nöß to nok voh? Eöß to vavaasis a noß neöm sih pa soe man. Eöm hikta vaman suk poß nem a soe peöß ataeah? 47A teß to kon a soe pe Sosoenën, eß a teß pe Sosoenën. Ivëhkëk, eöm varih o teß to hikta tënan nem a soe ne Sosoenën to sosoe non, eöm to hikta teß nem pan eöm o pus koaß pe Sosoenën.”

A Tasun Pe Ieesuß To Apuh Oah E Non Pa Tasun Pe Abraham

48Ko teß susunön po Jiuß piun a soe pe Ieesuß, pare soe pan, “A tuvuh hat to teß non pën, suk eën a to Samëriaß. A soe kës pemöm a man, keß ataeah?”

49Ke Ieesuß piun raoe, pareß soe pan, “Ahikta oraß hat to teß non manih peöß, eöß to kë varoe ko noß sih e Tamön. Ivëhkëk, eöm to hikta iu kë nem sih a teß ëhnaneoß. 50Eöß to hikta kehkeh noß pan, ta teß se kë ëhnaneoß, ahik, eß to teß ro non a pah tökiiki Teß ivëh e Sosoenën se kë a ëhnaneoß. Köm inan, paröm nat poß a soe peöß a man. 51Eöß to soe vaman rakah keoß peöm, etereh to vaman ne o vavaasis peöß ee to hikta onöt ne a mët.”

52Ko teß susunön po Jiuß piun poë, pare soe pan, “Kuru emöm to nat vavih em pën no a oraß hat to teß non manih pën. O teß vanënën soe ke Abraham to mëtmët vahik voh ee. Ivëhkëk, eën to sosoe avoeß e nom pan, ‘Etereh to vaman ne o vavaasis pën, ee hikta se mët ne.’ 53Eën koman kës nom pan a tasun pën to apuh oah e non pa teß tasun pe tamaara Abraham, me ro teß vanënën soe varih to mët voh, eën koman nom pan eën eteh?”

54Ke Ieesuß piun a soe pee, pareß soe pan, “Eöß se keh ta koman hah a noß, a, a taateß ta hah öß, se teß e non a tah akuk. Ka Teß vëh to kë non a ëhnaneoß, eß e Tamaneoß. Ivëhkëk, eöm to sosoe nem pan, ‘Eß e Sosoenën peöm.’ 55Eöm to hikta nat vavih rakah nem peß. Eöß se keh soe ka neöm pan eöß to hikta nat vavih rakah noß eah, eöß se tavus rakah eoß a teß pikpiuk vamanih peöm. Ivëhkëk, eöß to nat vavih rakah e noß peß e Tamön, paröß tënan vavih rakah e noß pa ma taneah neß to sosoe ka no neoß.

56E sipuineöm Abraham to haraß suntan rakah voh e non po vaeö pa poen nöß to nö maß. Eß to ep vahik voh en po poen pamëh nöß to nö maß ko kokoman peß puh rakah e non po vaeö.”

57Ko teß susunön po Jiuß soe pan, “Eën to hikta ep avoeß voh nom pe Abraham, suk ataeah, eën to hikta manot onöt avoeß nom to 50 kirismas.”

58Ke Ieesuß piun raoe, pareß soe pan, “Eöß to soe vamaman rakah ke voh eoß peöm, moaan voh ne sinan e Abraham to meß avoeß voh e non pa vahuh poan, eöß to teß momoaan voh e noß, paröß teß avoeß va e noß manih kuru.”

59E Ieesuß to soe vakomanih, ka napan kokon ee po vös to tösvös in poë, ivëhkëk, eß to ro këh en pee, kee hikta ep hah ne poë to këh tavus en pa Iuun Hinhin Apuh.